कॉंगड़ी-प्हाड़ी-च प्रकाशत साहित : रीत-परम्परां कनैं त्याह्स — रमेश चन्द्र ‘मस्ताना’

कॉंगड़ी-प्हाड़ी-च प्रकाशत साहित : रीत-परम्परां कनैं त्याह्स — रमेश चन्द्र ‘मस्ताना’

     श्री रमेश चन्द्र मस्ताना होरां अपणी कताब “कॉंगड़ी-प्हाड़ी-च प्रकाशत साहित : रीत-परम्परां कनैं त्याह्स” च अपनी मूरह्ली गल्ल च इस किताब दे लिखणे दे मकसद दे बारे च साफ-साफ दसी दित्तेह्या। सैह् लिखदे जिञा तिन्हां जिला कॉंगड़ा दियां हदां ते अन्दर ओंणे वाळे लिखारियां दियां रचनां दा इसा कताबा च जिक्र कित्तेह्या तिञा हर जिले दे लिखारी, अपणे जिले दे अपनी मां-बोली च लिखणे वाळे लिखारियां दियां रचनां पर लिखह्ण तां ‘हिमाचली पहाड़ी’ दा कल्याण होंणा। कुसी इक लिखारिये तांईं हिमाचल प्रदेश देयां बारहां जिलेयां देयां लिखारियां दियां सारियां रचनां कन्नैंं सही-सही नियां करना नामुमकिन तां नीं पर मुश्किल कम्म जरूर बझोंदा है। मस्ताना होरां हिमाचल प्रदेश दी भाषा दे नांयें दे बारे च मतभेदां दा जिक्र भी करदे कनैं तिसा दे ‘हिमाचली पहाड़ी’ नां दी वकालत करदे। सैह् एह् भी मनदे लग्गे कि ‘हिमाचली पहाड़ी’ जो मन्नता मिलणा अतिह्यें दूरा दी कौड़ी है। तिन्हां जो एह् गल्ल बड़ी अखरदी कि हिमाचली पहाड़ी च कवतां यानि कि पद्य तां खूब लिखोह्दा पर गद्य दे रूप च बड़ा घट छपादा। गद्य छापणा भाषा दी तरक्की तांईं बड़ा लाजमी है। मस्ताना होरां ‘हिमाचली पहाड़ी’ च ज्यादा ते ज्यादा कताबां छापणे दी जरूरत पर जोर दिंदे नजर आये। तिन्हां एह् सुझाओ भी बड़े जोरैं-शोरैं दित्तेह्या कि अपणियां लिखिह्यां कताबां दूजेयां लिखारियां च, खास करी नैं समीक्षा करने वाळेयां च, जरूर बंडणियां चाहिदियां ताकि तिन्हां जो पढ़ी करी तिन्हां पर लिखेया जाई सके।

    मिंजो मस्ताना होरां दियां गल्लां बड़ियां बद्धिया लगियां। दरअसल असां हिमाचली पहाड़ी जो कवतां कनैं गीतां दी भाषा बणायी छड्डेह्या। असां सट्टो-सट्टियैं कवतां लिखी जाह्दे कनैं कहाणी, नाटक, लेख बगैरा लिखणे दी टाळ करा दे। अनुवादे दे नांयें अतिह्यें किछ भी खास नीं। हिमाचली पहाड़ी च कवता लिखणा सौखा है कनैं गद्य लिखणा औखा। एह् औखा कम्म कुण करह्गा?

   लिखारियां जो इक-दूजे दियां कताबां पढ़णियां चाहिदियां। इसते इक बड़ा फायदा एह् होणा कि भाषा दा मानकीकरण अपणे-आप होंदा चलणा।

     कुसी भी गल्ला जो समझणे तांईं तिसा दिया जड़ा तिकर जाणा लाजमी होंदा है। कताबा दा पैहला ध्याये काॅंगड़ा कनैं कॉंगड़ी दे इतिहास पर सरसरी अपर डुग्घी नजर पांदा है। एह् जाणकारी मां-बोली कन्नैंं प्यार करने वाळे हर शख्स जो होंणा चाहीदी है।

       दूजे ध्याये च मस्ताना होरां साहित्ते दे भेद-प्रकार कनैं लोक साहित पर लौ पांदे हन। एह् ध्याये मेरे बरगे स्टूडेंटां तांईं बड़ा कम्में दा है। मस्ताना होरां अजकणें जमाने दियां खोजां - टीवी, कम्प्यूटर, लैपटॉप, मुवाइल, टैव दे सौगी-सौगी मीडिया कनैं सोशल मीडिया दे साहित दी तरक्की तांईं जोगदाने जो खास महत्व दिंदे हन। तिन्हां दा ग्लाणा है कि कवि कनैं लखारी समाजिक प्राणी बणने दे सौगी-सौगी जे साहित्तिक प्राणी भी बणन कनैं इक सच्ची-सुच्ची सोच रखण तां सैह् समाजे यो इक नौंयीं दिशा कनैं दशा देई सकदे हन। सैह् लोक साहित्ते दे खजाने जो संभाळी करी रखणे दी गुहार भी लगांदे हन।

       अपणिया इसा किताबा दे तीजे ध्याये च मस्ताना होरां कांगड़ी कवता दे प्रकाशत बक्खो-बक्खरे रूप-भेदां पर लौ पांदे हन। सैह् कांगड़ी-पहाड़ी जो चार जुगां च बंडदे हन। पैहले जुगे जो सैह् ‘बाबा कांशीराम जुग’ दा नां दिंदे हन। दूजे जुग दा समा सन् 1950 ते 1975 दा है जिस च सोमनाथ ‘सोम’, लच्छमन दास ‘मस्ताना’, चक्रधारी शास्त्री, डॉ. पीयूष गुलेरी, डॉ. गौतम शर्मा बगैरा दे जोगदान दा जिक्र है। त्रीया जुग बीह्मीं सदी दे मुकणे तिकर दिया कवता दा जुग है कनैं इकह्मीं सदी दे शुरू ते अज्जे तिकर दा जुग चौथा जुग है जिन्हां दा मस्ताना होरां विस्तार च वर्णन कितेह्या है।

     चौथे ध्याये च मस्ताना होरां कांगड़ी निबन्ध-लेखां दियां परम्परां पर नजर पांदे हन।

     पंजमें ध्याये च कांगड़ी उपन्यास, कहाणी, लघुकथा दी चर्चा-परचोळ विस्तार च साह्म्णें औंदी है। छठे ध्याये च मस्ताना होरां नाटक, इक-अंकी नाटक कनैं काव्य्-नाटकां दियां परम्परां दा जिक्र करदे-करदे अभिनै दियां किस्मां, नाटक दे तत्त्वां, पातरां, रसां, भेदां-प्रकारां च लौ पांणे दे कन्नैं-कन्नैं कांगड़ी च प्रकाशत नाटक साहित्त दा विस्तार च वर्णन करदे हन।

      कताबा दा सतुआं ध्याये साहित्तिक विधां दा कांगड़ी -पहाड़ी च उतारे/अनुवादे दियां परम्परां उप्पर लौ पांदा है। जद कि अठुआं ध्याये कांगड़ी लोक-गीतां पर विस्तारे नैं गल्ल करदा है कनैं तिन्हां दिया साज-सम्हाळा दिया जरूरत पर जोर दिंदा है।

       खीरी ध्याये च मुकदी गल्ल कनैं सार-निचोड़ करदे-करदे मस्ताना होरां मॉं-बोली दिया संभाळा कनैं तरक्किया तांईं बड़े कीमती सुझाओ दिंदे हन। एह् किताब अपणिया किस्मा दी नौखी कताब है। कांगड़ी पर शोध करने वाळेयां तांईं तां बड़े ही कम्मे दी है। मैं तां ग्लांदा अपणी भाषा कन्नैं प्यार करने वाळेयां जो एह् कताब जरूर पढ़ना चाहीदी।

— भगत राम मंडोत्रा